Saturday, January 16, 2010

ဘယ်မှာလဲ ကိုယ့်အတွက်

အမှန်တကယ်တော့ လူသားတိုင်းဟာ လူ့လောကကြီးကို ခေတ္တခဏ လာရောက်ကြတဲ့ ဧည့်သည်တွေပါ။ ဘယ်ကလာလဲ။ ဘယ်ကိုသွားမလဲ။ ဘယ်လို ဘယ်ပုံ လုပ်ကြမလဲ စသည်ဖြင့် လဲ ပေါင်းများစွားကလည်း အများကြီးပါ။

မိမိတို့ ရရှိထားတဲ့ ဘ၀ဟာ အလွန်ပဲ တိုတောင်းလွန်းလှပါတယ်။ မိမိဘ၀ကို ဘာတွေနဲ့ ဖြတ်သန်းခဲ့သလဲ။ မည်သည့်အရာတွေနဲ့ ဖြတ်သန်းနေဆဲလဲ။ ဘယ်လိုဘယ်ပုံ ဖြတ်သန်းအုံးမှာလဲ - စသည်ဖြင့် လဲ - ပေါင်းများစွာအတွက် စဉ်းစားစရာပါ။ (မောင်ဖိုးသား၊ အဖြူရောင်မေတ္တာစကားကို ယူသုံးခြင်းမဟုတ်ပါ။ စကားချပ်)

မွေးနေ့လုပ်တဲ့ ရည်ရွယ်ချက်တွေဟာ တဦးနဲ့တဦး မတူညီနိုင်ကြပေမယ့် သေခြင်းတရားကတော့ တူညီနေအုံးမှာပါ။ အိုခြင်းတရားတွေကတော့ တူညီနေကြရအုံးမှာပါ။ ပြီးခဲ့တဲ့နှစ်က ညီငယ် မောင်ဖိုးသား (အဖြူရောင်မေတ္တာ) အတွက် ရည်ရွယ်ပြီး ရေးခဲ့တဲ့ တခုခုတော့ လုပ်စေချင် ဆောင်းပါးကိုလည်း သတိရမိပြန်တယ်။ (ပညာဇာနည် ၊ http://pyinyarzarni.blogspot.com/ (၁၃၊ ၁၂၊ ၂၀၀၉ - မှာ ၀င်ရောက် ကြည်ရှုနိုင်ပါသည်။ စကားချပ် )

မိမိကိုယ်တိုင် အလုပ်မလုပ်ဘဲ မိဘ အမွေတွေကို ဒီအတိုင်း ထိုင်စားလို့ မကုန်နိုင်ဘူး ဆိုပေမယ့် အဲဒါက မျက်မြင်တွေ့ကြုံရတဲ့ အမွေတွေလေ။ အတိတ်က အမွေတွေ (စားကြွင်းတွေ)ကို ထိုင်စားပြီး ဘာကုသိုလ်မှ ဆက်မလုပ်ဘူးဆိုရင်တော့ တိုတောင်းလှတဲ့ဘ၀က ရင်လေးပြီး ဘ၀င်မအေးစရာ။ မျက်မြင်ကိုယ်တွေ့ ကြုံဆုံနေရတာ မဟုတ်တဲ့အတွက် အတိတ်က ကုသိုလ်ကံအမွေတွေ ဘယ်အချိန်ကုန်လို့ ကုန်မှန်းမသိတော့ ဘ၀က မသေချာ။ မသေချာ မရေရာတာတွေကို ဘေးဖယ်ပြီး သေချာအောင် ကုသိုလ်တခုခု လုပ်နေတာက ပိုပြီး စိတ်ချရမယ်ထင်တယ်။

ဒီနေရာမှာ စဉ်းစားစရာက ကိုယ့်အတွက် ကုသိုလ်တွေကို လုပ်မှာလား။ သူများအတွက် ကုသိုလ်တွေ လုပ်ကြမလားဆိုတာ စဉ်းစားစရာ ဖြစ်လာတယ်။ တချို့က ပြောကြတယ် “ ကိုယ်အတွက် ကုသိုလ်လေးတော့ လုပ်အုံးမှ ” တဲ့။ ကုသိုလ်လုပ်တာ ကိုယ့်အတွက်လို့ သဘောထားကြတယ် ထင်ပါရဲ့။

အမှန်တကယ်တော့ ကုသိုလ်လုပ်တာက ကိုယ့်အတွက် လုပ်တာမဟုတ်ပါဘူး။ သူများအတွက် လုပ်တာပါ။ ဒါန (အလှူ) လုပ်တယ်ဆိုတာ ကိုယ့်အတွက် လုပ်တာမှ မဟုတ်တာ။ သူများကို ပေးတာ၊ သူများကို ကျွေးတာလေ။ သီလစောင့်တယ်ဆိုတာကလည်း ကိုယ့်အတွက် စောင့်ကြတာမှ မဟုတ်တာ။ သတ္တ၀ါတွေ သေမှာစိုးလို့၊ သူများပစ္စည်းဥစ္စာတွေ အလကားနေရင်း ကုန်သွားမှာစိုးလို့။ အိမ်ထောင်ရေးတွေ ပြိုကွဲ ပျက်စီးမှာစိုးလို့ စသည်ဖြင့် သီလစောင့်ကြတာ မဟုတ်လား။ ဘယ်မှာလဲ ကိုယ့်အတွက်။

ဒါပေမယ့် လောကနိယာမ (သို့မဟုတ်) ကမ္မနိယာမတရား (သို့မဟုတ်) ဓမ္မနိယာမတရားက ဒီအတိုင်း လက်ပိုက်ကြည့် မနေပါဘူး ကိုယ်လုပ်တဲ့ အလုပ်ပေါ်မှာ သူတို့က ချက်ကင် (checking) အမြဲတမ်း လုပ်နေပါတယ်။ ကိုယ် ဘာလုပ်နေသလဲ။ ဘာလုပ်ခဲ့သလဲ။ သူတို့တွေ အမြဲတမ်း စောင့်ကြည့် နေပါတယ်။ အဲဒါတွေက မိမိ လုပ်နေတဲ့ အလုပ်အပေါ် သူတို့က ပြန်လည် စီရင်ချက်ချပေးသွားမှာပါ။ မလိုချင်လို့လည်း မရဘူး။ လိုချင်လို့လွန်းလို့လည်း ရမှာမဟုတ်ဘူး။

ဒီလို ပြောလိုက်ပြန်တော့ ဆုတောင်းဖို့ မလိုတော့ဘူးလားဆိုတဲ့ အတွေးတချက်ပေါ်လာပြန်တယ်။ ဆုတောင်းတယ်ဆိုတာ ဘာလဲ။ ဘာကြောင့် ဆုတောင်းတာလဲ။ ဒါလည်း စဉ်းစားဖို့ လိုလာပြန်တယ်။ ဆုတောင်းတာက ကိုယ်ဖြစ်ချင်တာကို ပြောပြတာ။ တိုင်တည်တာ။

ဘုရားဟောထားတာ ရှိတယ်။ ပါဠိစကားပေါ့။ ဆန္ဒာဓိပတိ ဆန္ဒသမ္ပယုတ္တကာနံ ဓမ္မာနံ တံ သမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော-တဲ့။ အဓိပ္ပါယ်ကတော့ ဆန္ဒကြီးလျှင် ကြံသမျှပြီး၏ -ဆိုတဲ့ မြန်မာစကားပုံ အတိုင်း ပါပဲ။

ဆန္ဒ ရှိရုံနဲ့ ပြီးနိုင်မလား။ ငါ သမ္မတကြီး ဖြစ်ချင်လိုက်တာ။ ကုဋေကြွယ်ဝတဲ့ သူဌေးဖြစ်ချင်လိုက်တာ။ ဖြစ်ရော့ဟဲ့ သမ္မတကြီး။ ဖြစ်ရော့ဟဲ့ သူဌေးကြီး။ ဖြစ်သွားပြီလား။ မနက်ဖြန် ပုတ်လောက်၊ သံစည်ပိုင်းလောက် ရှိတဲ့ ဒေါ်လာတွေ တနင့်တပိုးကြီး လာလေရော့။ ရောက်လာပြီလား။ စဉ်းစားဖို့ ပြောတာပါ။

ဆန္ဒရဲ့နောက်မှာ လိုလိုချင်ချင်နဲ့ ကြိုးစားအားထုတ်မှုလည်း ရှိအုံးမှ။ ငယ်ငယ်တုန်းက ကိုင်ဇာဆိုတဲ့ သီချင်းထဲကလို ထိုင်နေလို့တော့ ဘာမှ ဖြစ်မလာဘူး - ဆိုတာလေ။ နောက်တိ နောက်တောက် စကားနဲ့ဆိုပြန်တော့ ထသွားမှ ကျိုးမှန်းလည်း သိနေပါအုံးမယ်-တဲ့။ ဘာပဲ ပြောပြော မိမိလိုချင် ဖြစ်ချင်တာတွေကို လက်တွေ့ လုပ်ဆောင်မှုနဲ့ လိုလိုချင်လုပ်မှ ရလိမ့်မယ်ဆိုတာတော့ သံသယရှိစရာ လိုမယ်မထင်ပါဘူး။

ကဲ လိုလည်း လိုချင်ပါပြီ၊ ဆန္ဒလည်း ရှိပါပြီ။ ရမတဲ့လား။ စိတ်လည်းပါအုံးမှ။ ဆန္ဒရှိတာ စိတ်ပါနဲ့ တော်တော်လေးကွဲတယ်နော်။ ကိုယ့် ရည်မှန်းချက်ဆန္ဒတော့ ရှိပါရဲ့ စိတ်မပါ့တပါနဲ့ လုပ်နေပြန်ရင်လည်း တောင်းတဲ့ ဆုတိုင်းလည်း ပြည့်နိုင်ကြမယ် မထင်မိပြန်ဘူး။

အရေးကြီးတဲ့ အချက်ကတော့ ပညာရှိဖို့ အရေးကြီးဆုံးပဲ။ ပညာက အရာရာကို အဆုံးအဖြတ် ပေးသွားမှာပါ။ ပညာဟာ တကယ်တော့ ကျယ်ပြန့်လှပါတယ်။ လောကီနယ်မှာဆို မြင် မဆုံး၊ တွေး မဆုံး၊ ငေး မဆုံး၊ လိုက်လို့ကို မဆုံးနိုင်အောင် ပညာရပ်တွေက ရှေ့က ပြေးနေတယ်။ လောကီပညာနယ်က ထွက်မြောက်နိုင်လောက်တဲ့ (လောက+ဥတ္တရာ = လောကုတ္တရာ) ပညာ ဆိုရင်တော့ အားပါးပါး မီနိုင်မယ်ကို မထင်တော့ဘူး။


ဘယ်မှာလဲ ကိုယ့်အတွက်


မိမိရဲ့ လက်ရှိဘ၀ တခုမှာ ( ဒီဘ၀ကိုပဲ ပြောပါသည်) ဘာတွေပဲ လုပ်ခဲ့၊ ပြောခဲ့၊ ကြံစည်တွေးတောခဲ့။ နိယာမဆိုတဲ့ တရားသူကြီးချုပ်က အဆုံးအဖြတ်ပေးသွားမှာ အမှန်မုချပါပဲ။ ကောင်းကောင်း ဆိုးဆိုးပေါ့။ သူများအတွက်ပဲ ပြောပြော ကိုယ့်အတွက်ပဲ ပြောပြော။ ဘယ်မှာလဲ ကိုယ့်အတွက် ဆိုတာကတော့ ကိုယ့်ရဲ့ လုပ်ဆောင်ချက် စေတနာအတိုင်းပဲ ဆက်လက်လျှောက်လှမ်း ရမည်ဖြစ်ပါကြောင်းဖြင့် - ဘယ်မှာလဲ ကိုယ့်အတွက် ဆောင်းပါးကို ဒီမှာပဲ အဆုံးသတ်လိုက်ရပါသည်။

ပညာဇာနည် (မန်းတက္ကသိုလ်)
http://pyinyarzarni.blogspot.com/

No comments:

Post a Comment