Thursday, March 5, 2009

သြ၀ါဒပါတိမောက် (သို့ ) မြတ်စွာဘုရားရှင်တိုင်း တို့ ၏ အဆုံးအမတော် (၃)

အရှင်အာနန္ဒာသည် သတိ အမှတ်သညာ၌ ဧတဒဂ် ရရှိထားသူ ဖြစ်၍ ထို အကြောင်းအရာများကို ကောင်းစွာ မှတ်မိလျက် ရှိသည်။

ထို အကြောင်းမှ တစ်ပါး ပါတိမောက် ပြဆိုတော်မူခြင်းကို သိလိုသော ဆန္ဒ ဖြစ်ပေါ်လေ၏။ အဘယ်ကဲ့သို့နည်း ဟူမူ အခြား အခြားသော တထာဂတ များသည် ယခုကဲ့သို့ပင် လခွဲတစ်ကြိမ်စီ ဥပုသ် ပြု၍ ဘုရားရှင်က ပါတိမောက် ပြတော် မူလေသလော။ ထို ပါတိမောက် ဒေသနာတော် များသည်လည်း ယခု ဗုဒ္ဓသခင်၏ အဆိုအမိန့် သြဝါဒများ နှင့်မတူ ကွဲပြား ခြားနားမှုများ ရှိပါသေး သလား။ ကြားနာ လိုသည်။ အာနန္ဒာ မထေရ်သည် မိမိကိုယ်တိုင် မဝေခွဲနိုင်သော သိလိုသမျှသော သံသယ ပြဿနာ အမျိုးမျိုး တို့ကို ဖြေရှင်း ဟောကြား ပေးပါရန် မြတ်စွာဘုရားသခင်အား ချဉ်းကပ် လျှောက်ထားခွင့် အထူးကိုလည်း ရရှိထားသည့် မထေရ်ဖြစ်ပေသည်။

ထို့ကြောင့် မြတ်စွာဘုရားထံ ချဉ်းကပ်၍ မေးလျှောက်လေ၏။

ထိုအခါ မြတ်စွာဘုရားက ဤသို့ မိန့်ကြားတော်မူ၏။

“ ချစ်သား အာနန္ဒာ၊ ဝိပဿီမြတ်စွာဘုရားသည် ခုနစ်နှစ်တစ်ကြိမ် သြဝါဒပါတိမောက် ဥပုသ်ကို ပြု၏။ အဘယ့်ကြောင့်ဆိုသော် တစ်ကြိမ်ပြသော သြဝါဒသည် ခုနစ်နှစ်ပတ်လုံး တည်၏။ ထို့ကြောင့် ခုနစ်နှစ်ကြာမှ တစ်ကြိမ်မျှလောက်သော ဆုံးမသြဝါဒ ဥပုသ်ကို ပြုလေသည်။

“ ထို့အတူ သိခီမြတ်စွာဘုရားသည် လည်းကောင်း၊ ဝေဿဘူမြတ်စွာဘုရားသည် လည်းကောင်း ခြောက်နှစ်တစ်ကြိမ် ဥပုသ် ပြုလေ၏။

“ ကကုသန်နှင့် ကောဏာဂုံဘုရားတို့သည် တစ်နှစ်တစ်ကြိမ်ကျ ဥပုသ်ကို ပြုလေ၏။

“ ကဿပမြတ်စွာဘုရားသည် ခြောက်လတစ်ကြိမ် ဥပုသ်ကို ပြုတော်မူ၏။ ။”

ဤကဲ့သို့ ထို မြတ်စွာဘုရားသခင် တို့၏ ဥပုသ် ပြုရာ အချိန် တို့မှာ ကာလ ကွာပြား ခြားနားခြင်းသာ ဖြစ်၍ အဆုံးအမ သြဝါဒ ပါတိမောက် ပြသော တရား စကားမှာကား ကွဲပြားခြင်း မရှိ၊ ထပ်တူ ထပ်မျှ ပင်တည်း “ - ဟု မိန့်တော်မူ လေသတည်း။

စိတ်ဆိုသောစိတ်နှင့် ပတ်သတ်၍ သဗ္ဗပါပဿ အကရဏံ - အစချီသော ဒေသနာတော်တွင် ဖော်ပြထားပါသည်။

“ မကောင်းမှုဟူသမျှကို ရှောင်၊
ကောင်းမှုဟူသမျှကို ဆောင်၊
စိတ်ကို စင်ကြယ်အောင်ထား၊
အဲဒါ မြတ်စွာဘုရားတို့၏ အဆုံးအမစကား။ ။ "

ယခုလို ဆောင်ပုဒ်ကလေးလုပ်၍ နှုတ်မှ တတွတ်တွတ် ရွတ်ဆိုလေ့ ရှိကြပါသည်။ ထိုမှ တစ်ဆက်တည်း အနက်အဓိပ္ပာယ်ကို ကိုယ့်ဉာဏ်နှင့်ကိုယ် စဉ်းစားကြည့်ကြသော် -


“ မကောင်းမှုဟူသမျှကို ရှောင်သည့်အခါ ဖြစ်စေ၊ ကောင်းမှုဟူသမျှကို ဆောင်သည့်အခါ၌ ဖြစ်စေ မိမိစိတ်ကို စင်ကြယ်အောင် ထားရမည်။” စိတ်သည် မျက်စိတစ်မှိတ် လျှပ်တစ်ပြက် အတွင်းတွင်ပင် လျှင်မြန်စွာ ပြောင်းလဲနိုင်သည် - ဆိုသော စကားကို လူတိုင်းလက်ခံနိုင်ကြပေလိမ့်မည်။ ထို့ကြောင့် စိတ်ကောင်းရှိအောင် မွေးမြူကြပါ။

(ဆက်လက်ဖတ်ရှုရန်....)

(ဤဆောင်းပါးကို http://kyawkyawoo81.blogspot.com မှ တဆင့်ပြန်လည် ကူးယူဖော်ပြခြင်းဖြစ်ပါသည်။)

No comments:

Post a Comment