Friday, January 16, 2009

The Highest Noble Properties Of Three Gems - Part 4 (ရတနာသုံးပါး ဂုဏ်တော်များ-အပိုင်း ၄)

(ဘုရားဂုဏ်တော် အဆက်...)
ဗုဒ္ဓဂုဏ်တော် အဖွင့်
သစ္စာလေးတန် တရားမှန်ကို ဧကန်သိပေ များဝေနေကိုလည်း ခရီးနှေးသုံးလှမ်း အမြန်တလှမ်းဖြင့် ကြွမြန်း တော်မူလတ်၍ သိစေတော်မူတတ်သည်၏ အဖြစ်ကြောင့်လည်း ဗုဒ္ဓ ဂုဏ်ထူးဖြင့် ချီးကျူးခြင်းငှာ ထိုက်တော်မူသော သဗ္ဗညုမြတ်စွာဘုရား၊ မြတ်စွာဘုရား၊ မြတ်စွာဘုရား။

ဝါသနာတွင်း မှောင်အလွန်ပြင်းသည့် မောဟတည်းဟူသော အိပ်ပျော်ခြင်းမှ နှိုးမည့်သူကင်း၍ လင်းချိန် ရောက်ပြန် ဧကန်ပင် နှိုးတော်မူတတ်သည်၏ အဖြစ်ကြောင့်လည်း ဗုဒ္ဓ ဂုဏ်ထူးဖြင့် ချီးကျူးခြင်းငှာ ထိုက်တော်မူသော သဗ္ဗညုမြတ်စွာဘုရား၊ မြတ်စွာဘုရား၊ မြတ်စွာဘုရား။

ဘဂဝါဂုဏ်တော် အဖွင့်

လောကီ၊ လောကုတ္တရာ ချမ်းသာနှစ်မျိုး ဖွံ့ဖြိုးဝေလှိုင်၍ မတုနိုင်စေရန် ကျိုးပေးသန်လှသည့် ဘုန်းကံတန်ခိုး ထိပ်တန်းစား ပါရမီမျိုးရှိတော်မူသည်၏ အဖြစ်ကြောင့် ဘဂဝါ ဂုဏ်ထူး ဖြင့် ချီးကျူးခြင်းငှာ ထိုက်တော် မူသော သဗ္ဗညုမြတ်စွာဘုရား၊ မြတ်စွာဘုရား၊ မြတ်စွာဘုရား။

ဒေဝပုတ္တ ကိလေသနှင့် အဘိသင်္ခါရ ခန္ဓ မစ္စု မာရ်ငါးခုကို တစ်ခုမကျန် ဧကန် ဖျက်ဆီး ပြီးတော်မူသည်၏ အဖြစ်ကြောင့်လည်း ဘဂဝါ ဂုဏ်ထူးဖြင့် ချီးကျူးခြင်းငှာ ထိုက်တော်မူသော သဗ္ဗညုမြတ်စွာဘုရား၊ မြတ်စွာဘုရား၊ မြတ်စွာဘုရား။

ရှစ်ဖြာသော လောကီတန်ခိုး စိတ်တော်ကို ပိုင်စိုးနိုင်သည့် “ဣဿရိယ“ ဘုန်းတော်၊ တရား လောကုတ္တရာ ကိုယ်တော်မှာ ရှိသည့် “ဓမ္မ”ဘုန်းတော်၊ ဘဝဂ်ဘုံမဆန့်အောင် ဂုဏ်သတင်း ပြန့်သင်း၍ သန့်ရှင်းကျော်ကြားတော်မူသည့် “ယသ”ဘုန်းတော်၊ လက္ခဏာကြီးငယ် ကိုယ်တော်ဝယ် တင့်တယ်လှပပါသဖြင့် ဖူးလို့ပင် မဝနိုင်သည့် “သီရိ” ဘုန်းတော်၊ မိမိသူတစ်ပါး အကျိုး စီးပွါး ကိုလိုသလိုပြီးစေနိုင်သည့် “ကာမ” ဘုန်းတော်၊ ဝိရိယပါရမီဖြစ်၍ မဂ်မှာတည်ဘိ သဖြင့် ဝိရိယခေါ်သည့် “ပယတ္တ”ဘုန်းတော်၊ ဤဘုန်းတော်ခြောက်စုံအံ့မကုန်နိုင်သည့် ဂုဏ်တော်တို့ နှင့် ပြည့်စုံတော်မူသည်၏ အဖြစ်ကြောင့်လည်း ဘဂဝါဂုဏ်ထူးဖြင့် ချီးကျူးခြင်းငှာ ထိုက်တော် မူသော သဗ္ဗညုမြတ်စွာဘုရား၊ မြတ်စွာဘုရား၊ မြတ်စွာဘုရား။

အလုံးစုံသော တရားဓမ္မကို ကုသလာဒိဘေဒတသွယ် ထိုဝယ်တစ်ခါ ခန္ဓာဒိဘေဒဆွယ်၍ လေးသွယ်သစ္စာ တစ်ဆယ့်ခြောက်ဖြာ ဝေဖန်ခါဖြင့် ဒေသနာဖြန့်ဖြူး၍ ရောင်ခြည်တော်ကွန့်မြူးအောင် အထူးပင်သုံးသပ် လျက် တာဝတိံသာနတ်ပြည်ကြီး၌ မယ်တော်မိနတ်သား အမှုးထား၍ ဟောကြားတော်မူအပ်သည်၏ အဖြစ် ကြောင့်လည်း ဘဂဝါ ဂုဏ်ထူးဖြင့် ချီးကျူးခြင်းငှာ ထိုက်တော်မူသော သဗ္ဗညုမြတ်စွာဘုရား၊ မြတ်စွာဘုရား၊ မြတ်စွာဘုရား။

ဒိဗ္ဗ ဗြဟ္မ အရိယဝိဟာရနှင့် ကာယ၊ စိတ္တ၊ ဥပဓိဝိဝေသုံးထွေဝိမောက္ခ ဥတ္တရိမနုဿ ခေါ်ဆိုကြသည့် ဈာန်မဂ်ဖိုလ်ကို လိုသလိုသာလျှင် များစွာမှီဝဲဆည်းကပ်တော်မူသည်၏ အဖြစ်ကြောင့်လည်း ဘဂဝါ ဂုဏ်ထူးဖြင့် ချီးကျူးခြင်းငှာ ထိုက်တော်မူသော သဗ္ဗညုမြတ်စွာဘရား၊ မြတ်စွာဘုရား၊ မြတ်စွာဘုရား။

မြို့ရွာသံတိတ် လူကင်းဆိတ်၍ တခြားစိတ်မပြောင်းကမ္မဋ္ဌာန်းဝင်ဘို့ ကောင်းသည့် တောရကျောင်းကို ကိန်း အောင်းမွေ့လျှော် မှီဝဲဆည်းကပ်တော်မူသည်၏ အဖြစ်ကြောင့်လည်း ဘဂဝါ ဂုဏ်ထူးဖြင့် ချီးကျူးခြင်းငှာ ထိုက်တော်မူသော သဗ္ဗညုမြတ်စွာဘုရား၊ မြတ်စွာဘုရား၊ မြတ်စွာဘုရား။

နိဂုံးချုပ်ဘုရားရှိခိုး

ဤသို့ အရဟံ-အစ ဘဂဝါ-အဆုံး အကျဉ်းချုံးငြား ဂုဏ် (၉)ပါးနှင့် ဂုဏ်ခြောက်ဆယ်ပွါး၍ မြတ်ဘုရား သည်ပင် စကားမသုံးဘဲ အသက်ထက်ဆုံး သီကုံးထောမနာ ဟောမြွက်ပါလည်း သက်တော်သာကုန် ဂုဏ်မစုံနိုင်ကြ၍ အနန္တဂုဏ် အသင်္ချေယျဂုဏ် အပ္ပမေယျဂုဏ်တို့နှင့် ပြည့်စုံတော်မူလတ်သည့် ဘုရားရှင်ကိုယ်တော်မြတ်ကြီးကိုလည်းကောင်း၊ ရှင်တော်မြတ်၏ကိုယ်စား ဓိဋ္ဌာန်ထားတော်မူအပ်ခဲ့သည့် ဓာတ်တော်သုံးသွယ် စွယ်တော်လေချောင်း ဆံတော်ပေါင်းစု ဆင်းတုစေတီတော် ပရိဘောဂစေတီတော် ဓာတုစေတီတော်မြတ်တို့ကိုလည်းကောင်း၊ ရုပ်ဓာတ်နာမ်ဓာတ် ပရမတ်ပေါ်တွင် ပညတ်တင်ခေါ် တပည့် တော်သည် ဂုဏ်တော်ကို စိတ်ဖြင့်ရည်မှန်း နှုတ်ဖြင့်ချီးမွမ်းပြီးလျှင်နဖူးတွင် လက်အုပ်တင်ထား၍ ကိုယ်ကို ညွတ်တွားကာ ထိငါးဖြာဖြင့် ရိုသေစွာ ရှိခိုးကန်တော့ပါ၏ အရှင်ဘုရား။ လောကဓာတ်အားလုံးတွင် အမြတ်ဆုံးဟုယုံကြည်ပြု၍ ကိုးကွယ် ဆည်းကပ်မှုလည်းပြုပါ၏ အရှင်မြတ်ကြီးတို့ဘုရား။

ဘုရားဂုဏ်တော်(၉)ပါး မြန်မာပြန်ဘုရားရှိခိုးပြီး၏။

No comments:

Post a Comment